"7 il şad olmaq üçün..." | Su çərşənbəsini özünəməxsus şəkildə qeyd edən tatların sirləri - Baku TV

Novruzun ilk çərşənbəsi olan Su çərşənbəsi artıq ölkəmizə qədəm qoyub.

Bu bayramı bütün Azərbaycan xalqı kimi, ölkəmizdə yaşayan azsaylı xalqların nümayəndələri də öz adət-ənənələri ilə qeyd edirlər. Quba rayonunun Mirzəqışlaq kəndində yaşayan tatlar da milli adət ənənələrini qoruyub saxlayırlar və nəsildən-nəslə ötürürlər.

Tatların Novruzla bağlı ən özəl adətlərindən biri Su çərşənbəsində həyata keçirilən təmizlik və paklıq ənənəsidir. Kənd sakini Yeganə Paşayeva deyir ki, sakinlər səhər tezdən bulaqdan su gətirir və bu suyu evdə hamı içir:

“Xeyir-dua verə-verə həmin suyu evin divarlarına çiləyirlər. Bu sudan istifadə edərək buğdanı yuyurlar və Novruz xonçasının bəzəyi olan səməni hazırlığının ilk addımlarını atırlar”.

Su çərşənbəsi süfrəsində çoxsaylı şirniyyatlar da yer alır. Kənd sakini Mehriban Məmmədova tatların məşhur təamlarından danışıb:

“Bizim ən məşhur təamımız plovdur. Hər bir ailə Su çərşənbəsində bu gözəl neməti bişirir. Həmçinin buğdadan qovurğa hazırlanır, onun içərisinə kişmiş, qoz ləpəsi və badam əlavə olunur”.