"90 faizi məhv olub, ölüm səbəbləri..." | Fermerləri minlərlə manat ziyana nə saldı? - Baku TV

Azərbaycanın şimal bölgəsindəki arıxanalarda yayılan xəstəlik təsərrüfat sahiblərinə ciddi maddi ziyan vurub.

Zərərçəkən fermerlərdən birinin sözlərinə görə, son iki ildə təsərrüfatındakı itkilərin sayı kəskin artıb:

“2023-cü ildən bəri 300-ə yaxın arı itirmişəm. Təkcə 2024-cü ildə 106 yeşik məhv olub ki, bu da təxminən 40 min manatlıq ziyan deməkdir. Bura əldə olunmayan bal gəlirini də əlavə etsək, rəqəm daha da böyüyür. Hazırda arılar qırıla-qırıla gedir, dərmanı da ölkəmizdə yoxdur”.

Məsələ ilə bağlı açıqlama verən mütəxəssis Surxay Ağakişiyev bildirib ki, kütləvi tələfata səbəb 2023-cü ildə Orta Asiyadan ölkəyə daxil olan “Tropilaelaps” gənəsidir. Onun sözlərinə görə, bir çox arıçı bu parazit növü ilə mübarizə üsullarını kifayət qədər bilmədiyi üçün arıxanalar sürətlə sıradan çıxır.

Mütəxəssis qeyd edib ki, əsas mübarizə tədbiri kimi yay aylarında ana arını izolyatora salmaqla təbii turşulardan istifadə edilməlidir:

“Hazırda arıçılığın xilası və bu sahənin gələcək inkişafı üçün lazımi dərman preparatları ölkəyə gətirilməlidir”.