"AzParking"də avtomobilə ziyan dəyərsə, onu kim qarşılamalıdır? | Sürücülərin diqqətinə

Artıq sürücülər avtomobillərini rahat şəkildə park etmək üçün “AzParking” mobil tətbiqindən istifadə edirlər.

Bu tətbiq sürücülərin işini bir tərəfdən asanlaşdırsa da, digər tərəfdən suallar yaradan məqamlar var.

Maraqlıdır, “AzParking”də avtomobilə dəyən ziyana görə kim məsuliyyət daşıyır?

Azərbaycan Yerüstü Nəqliyyat Agentliyinin mətbuat katibi Tural Orucov bildirib ki, parklanma məntəqəsində avtomobili park edən sürücülər mühafizəyə görə deyil, parklanma yerinin istifadəsinə görə ödənişləri edirlər:

“Parklanma məntəqəsində avtomobillə bağlı hər hansı bir neqativ hala görə isə AYNA məsuliyyət daşımır. Parklanmaya nəzarət edən xüsusi ayrılmış əməkdaşların hər məntəqədə olması mütləq və məcburi deyil.

Hər bir parklanma məntəqəsində parklanma və ödənişlərin həyata keçirilməsi qaydalarını əks etdirən lövhələr quraşdırılıb. Sürücülər məlumat lövhələrindəki informasiyaya uyğun olaraq parklanma prosesini reallaşdıra bilərlər”.

Nəqliyyat eksperti Elməddin Muradlı qeyd edib ki, avtomobillərin icbari və kasko sığortası olur və dəymiş hər hansı bir zərəri yalnız sığorta qarşılaya bilər:

“Hansısa məkanda və ya parkinq ərazisində dəymiş ziyana görə həmin ərazinin ödəniş etmək kimi qanun-qaydası yoxdur. Ola bilər ki, hansısa ərazidə maşın saxlanılıb, üzərinə ağac aşıb və buna görə “AzParking” kiməsə pul ödəməli deyil. Nəqliyyat vasitəsinin kasko sığortası varsa, onun yalnız kasko ödənişini almaq olar”.