"Birbank" yeni layihəyə start verdi | Məktəblərdə bullinqə qarşı mübarizə

Son zamanlar sosial şəbəkələrdə məktəblərdə uşaqlar arasında davranış pozuntuları, bir neçə məktəblinin bir olub öz həmyaşıdına qarşı mənəvi və psixoloji təsir göstərməsi halları ilə tez-tez qarşılaşırıq.

Ölkəmizdə bu mövzu kifayət qədər araşdırılmadığı üçün müəllim, valideyn və şagirdlərin əksəriyyəti prosesin içində olsa da, bunun fərqində olmurlar. Çünki çox vaxt valideyn və müəllimlər uşaqlar arasındakı bu cür münasibətləri adi konflikt olaraq görürlər.

Ölkəmizdə bu prosesin geniş araşdırılması üçün yeni layihəyə başlanılıb.

“Birbank”ın təşəbbüsü və sponsorluğu, “Dərs Evi” Tədris Mərkəzinin təşkilatçılığı və Azərbaycan Respublikasının Təhsil İnstitutunun dəstəyi ilə “Dəyişiklik səndən başlayır” ümumtəhsil məktəblərində bullinqlə mübarizə layihəsinə start verilib.

“Birbank”ın İdarə Heyətinin üzvü Fərqanə Məmmədova cəmiyyətimizdə bullinqə qarşı həssaslığın artırılmasının vacibliyini vurğulayıb. O bildirib ki, layihənin əsas məqsədi uşaqları, valideynləri və müəllimləri maarifləndirməkdir.

Şagirdlərdə narahatlıq yaradan, özünə inamı azaldan və onların psixoloji rifahına mənfi təsir göstərən bu problemin həlli üçün beynəlxalq ekspertlər tərəfindən “Dərs Evi” Tədris Mərkəzinin müəllimləri üçün xüsusi təlimlər keçiriləcək. Layihənin icrasına ilk olaraq 18 saylı orta məktəbdən başlanılacaq. Bu məqsədlə tərəflər arasında xartiya imzalanıb.

Qeyd edək ki, “Birbank” Korporativ Sosial Məsuliyyət strategiyası çərçivəsində cəmiyyətimiz üçün önəmli mövzulara xüsusi diqqət yetirir və mütəmadi olaraq müxtəlif sosial layihələrə dəstək verir. Bullinq kimi dünya miqyasında aktual olan sosial problemə qarşı mübarizə təşəbbüsü bu istiqamətdə atılan növbəti mühüm addımdır.