"Düzəltmirlər, baxmırlar!" - Bağçada böyük təhlükə | "Belə olsa, qoymayacağam..." - Baku TV

Gəncədə 12 gün əvvəl əsən güclü külək şəhərdə bir sıra fəsadlar törədib.

Təbii fəlakət nəticəsində 46 nömrəli körpələr evi-uşaq bağçasının dam örtüyü uçub, lakin hələ də təmir edilməyib.

Valideynlərdən biri mövcud vəziyyətə narazılığını ifadə edərək deyib: “Küləyin bir dəfə əsməsi ilə dam dağılıb töküldü. Bir azdan yağış yağsa, bağçanın içinə dolacaq. Baxan yoxdur”.

“İş adamıyam deyə məcbur qalıb uşağı bağçaya qoyuram. Belə davam etsə, qoymayacağam”, – deyə digər bir valideyn söyləyib.

Məsələ ilə əlaqədar Gəncə-Daşkəsən Regional Təhsil İdarəsindən bildirilib ki, güclü külək nəticəsində sözügedən uşaq bağçasının dam örtüyünə dəymiş zərərin miqyası dəyərləndirilib:

“Yaxın günlərdə təhsil müəssisəsində zəruri təmir-bərpa işlərinin həyata keçirilməsi və bağçanın infrastrukturunun əvvəlki vəziyyətinə qaytarılması nəzərdə tutulur. Hazırda müəssisədə təlim-tədris prosesinin fasiləsizliyi təmin edilib. Təhlükəsizliyin təmin edilməsi məqsədilə uşaqların məşğələləri müəssisənin digər korpusunda davam etdirilir”.