"Gördüm ki, tabutun içində uzanıb" | 2 uşaq anası Fidan həkim səhvinin qurbanı oldu? - ARZUNUN VAXTI

“Arzunun vaxtı” verilişində bu dəfə Nuru Babayev öz həyat hekayəsini danışıb.

O, həyat yoldaşı Fidan Babayevanı itirəndən sonra yaşadığı çətinliklərdən söz açıb.

Nuru Fidanın həkim səhlənkarlığı səbəbindən xərçəng olduğunu iddia edib:

“Fidan hamamda ayağı sürüşüb yıxılmışdı. Sağ çiyni vannanın kənarına dəydiyi üçün ağrıları var idi. Xəstəxanaya gedəndə həkim iynəni səhv yerə – onun limfasına vurdu. Bundan sonra Fidanın bədəni şişməyə başladı və limfa xərçəngi oldu”.

O, həyat yoldaşı ilə son danışığını isə belə xatırlayıb:

“Mən Naxçıvanda idim, Fidan isə Bakıda müalicə alırdı. Qayınanam zəng edib yoldaşımın halının pisləşdiyini, təcili Bakıya gəlməli olduğumu söylədi. Bir müddət sonra o, təkrar görüntülü yığdı. Bu vaxt Fidan səsimi eşidib üzümə baxdı. Yadımdadır ki, son dəfə məndən nəsə istədi, amma onu eşidə bilmədim, sonra isə ömürlük gözlərini yumdu. Bu da çiynimdə yük olaraq qaldı”.

Nuru Fidan üçün darıxdığını, onsuz yaşamağın çox çətin olduğunu söyləyib:

“Fidan dünyasını dəyişəndən sonra ətrafımda heç kim qalmadı. Hamını onunla birlikdə basdırdım. Təkcə Fidanın məzarında hüzur tapıram. Qalan ömrümü qızlarıma həsr etmişəm”.