"Hamısı dedi ki, lal-kardır, bunu niyə..." | Pensiyası kəsilən 16 yaşlı Röyalın nənəsi kömək istədi

Sabirabadın Yolçubəyli kənd sakini Böyükxanım Eyvazova Baku TV-nin qaynar xəttinə müraciət edib.

O, anadangəlmə eşitmə və nitq qüsurlu olan 16 yaşlı nəvəsi Röyal Eyvazovun pensiyasının kəsilməsindən şikayətçidir.

Ailənin maddi vəziyyətinin ağır olduğunu deyən nənə aidiyyəti qurumlardan kömək istəyir.

“2018-ci ildə pensiya təyin olunsa da, 3 ildən sonra kəsildi. Hər dəfə xəstəxanalarda, müayinələrdə və komissiyalarda olmuşuq. Bu uşaq anadangəlmə lal və kardır, sağalan deyil”, – deyə o bildirib.

Böyükxanım Eyvazova ailənin ağır sosial vəziyyətini diqqətə çatdıraraq qeyd edib ki, uşağın işləmək imkanı yoxdur, anası da eşitmə qüsurlu və nevroloji xəstədir:

“Mən bu gün var, sabah yoxam. Xahiş edirəm, nəvəmin ömürlük pensiyası bərpa edilsin ki, heç olmasa, özünü dolandıra bilsin”.