"Kürd Elnur"un məhkəməsində ittiham aktı elan olundu

“Kürd Elnur” ləqəbi ilə tanınan Elnur Abbasovun cinayət işi üzrə məhkəmə istintaqının ilk baxış iclası keçirilib.

Bakı Ağır Cinayətlər Məhkəməsinin hakimi Faiq Qəniyevin sədrliyi ilə baş tutan prosesdə dövlət ittihamçısı Babaxan Həsənəliyev təqsirləndirilən şəxsə ittiham aktını elan edib.

Elnur Abbasova qarşı Cinayət Məcəlləsinin 3 maddəsi – 221.1 (xuliqanlıq), 234.4.3 (qanunsuz olaraq narkotik vasitələri, psixotrop maddələri əldə etmə, saxlama, daşıma, göndərmə və ya satma), 228.4 (qanunsuz olaraq odlu və soyuq silah əldə etmə və gəzdirmə) maddələri ilə ittiham irəli sürülüb. O isə özünü yalnız 221.1 (xuliqanlıq) maddəsi ilə təqsirli bilib, digər maddələrin isə ümumiyyətlə onun törətdiyi əməllə hər hansı əlaqəsinin olmadığını deyib.

İttihama görə, onun törətdiyi xuliqanlıq əməlindən zərərçəkən şəxs ifadə üçün prosesə dəvət olunsa da, vaxt məhdudiyyətindən təqsirləndirilən şəxslə zərərçəkənin sərbəst ifadələri iyulun 31-də keçiriləcək növbəti prosesədək təxirə salınıb.