"OBA" market qurdlu məhsul satır? | "Veysəloğlu" şirkəti cavab vermədi

Demək olar ki, hər gün müxtəlif marketlərdə vaxtı keçmiş xarab məhsulların satılması ilə bağlı məlumatlar yayılır.

Bu dəfə isə belə bir xəbər paylaşılıb ki, müştərinin “OBA” marketlər şəbəkəsindən aldığı biskvit qurdlu çıxıb. Fotolardan qida məhsulunun hətta köhnəlikdən ovulduğu da görünür.

Baku TV məsələ ilə bağlı adıçəkilən marketlər şəbəkəsinin aid olduğu “Veysəloğlu Şirkətlər Qrupu” ilə əlaqə saxlayıb. Şirkət Baku TV-nin suallarından yayınıb. Bildirilib ki, elektron poçt ünvanı vasitəsilə 1 həftə ərzində problemlə bağlı suallar cavablandırılacaq.

Xatırladaq ki, "Media haqqında" qanuna görə edilən müraciətdə qeyd olunan informasiya operativliyini itirərsə, dərhal, bu, mümkün olmadıqda isə 24 saatdan gec olmayaraq cavab verilməlidir.

Belə çıxır ki, insanların bir başa zəhərlənməsinə səbəb ola biləcək hal baş verməsinə baxmayaraq, sözügedən şirkət vəziyyəti ciddiyə almır. Görünür, “Veysəloğlu Şirkətlər Qrupu” üçün məhsulların keyfiyyəti və müştəri məmnunluğu önəmli deyil.