"Tərk elə buranı!" | Sakinləri boğaza yığan obyektin sahibi jurnalisti qovdu - Baku TV

Bakının Nəsimi rayonu, Cavadxan küçəsi, 44 ünvanında fəaliyyət göstərən gecə klubunun yaratdığı səs-küy və ətrafda baş verən xoşagəlməz hadisələr yerli sakinlərin ciddi narazılığına səbəb olub.

Sakinlər bildirirlər ki, obyekt fəaliyyətə başladığı gündən ərazidə asayiş pozulur və gecə saatlarında istirahət etmək qeyri-mümkün hala gəlir.

Şikayətçilərdən birinin sözlərinə görə, təxminən iki aydır açılan bu klub sakinlərin rahatlığını tamamilə əlindən alıb.

O qeyd edib ki, gecə saat 12-dən səhər 6-7-yə qədər davam edən səs-küy səbəbindən mənzillərdə yatmaq mümkün deyil. Dəfələrlə obyektin icarədarlarına narazılıq ifadə olunsa da, sakinlərə məhəl qoyulmayıb.

Məsələ ilə bağlı Daxili İşlər Nazirliyindən (DİN) verilən məlumata görə, sözügedən ünvanda vətəndaşların rahatlığını pozan məişət səs-küyü ilə bağlı daxil olan şikayət əsasında polis əməkdaşları tərəfindən dərhal müvafiq tədbirlər görülüb:

“İaşə obyektinin icarədarı barəsində İnzibati Xətalar Məcəlləsinin müvafiq maddəsi ilə inzibati tənbeh tədbiri tətbiq edilib. Eyni zamanda analoji halın yenidən təkrarlanacağı təqdirdə obyekt rəhbərliyinə qarşı daha ciddi məsuliyyət tədbirlərinin görüləcəyi də diqqətə çatdırılıb”.