Razi Əliyevaya təzyiq edən şirkət rəhbəri hakim qarşısına çıxarıldı

Model Razi Əliyevaya qarşı zorakılıqda ittiham olunaraq barəsində həbs qətimkan tədbiri seçilən Ziya Hüseynzadənin cinayət işi üzrə məhkəmə hazırlıq prosesi keçirilib.

Bakı Ağır Cinayətlər Məhkəməsində hakim Səyavuş Hacıyevin sədrliyi ilə keçirilən proses zamanı təqsirləndirilənin anket məlumatları dəqiqləşdirilib.

Məhkəmədə iştirak edən zərərçəkmiş tərəfin vəkilləri prosesin qapalı keçirilməsi barədə şifahi vəsatət qaldırsa da, ittiham olunan Ziya Hüseynzadə buna etirazını bildirərək onunla bağlı keçirilən bütün məhkəmə proseslərinin açıq keçirilməsini istəyib. Daha sonra təqsirləndirilən şəxsin vəkili onun ev dustaqlığına buraxılması ilə bağlı vəsatət qaldırıb. Məhkəmə vəsatəti təmin etməyib. Təqsirləndirilən şəxsə məhkəmə bildirişi gec çatdığı üçün hazırlıq iclasının davamı yanvarın 17-nə təyin olunub.

Qeyd edək ki, model Razi Əliyevanın üzərindəki xəsarətlərlə bağlı sosial şəbəkələrdə yayılan görüntülər araşdırılarkən ona qarşı zorakılıq hadisəsinin ötən il mayın 26-da baş verdiyi müəyyənləşdirilib. İddia olunub ki, Ziya Hüseynzadə Razi Əliyevaya qarşı onun anasının Lökbatan qəsəbəsində yerləşən mənzilində nalayiq ifadələr işlədib, zor tətbiq edərək giriş qapısını zədələyib.

Ziya Hüseynzadə Cinayət Məcəlləsinin 133 (əzab vermə), 177.3 (oğurluq), 182.3.2 (hədə-qorxu yolu ilə tələb etmə), 186 (əmlakı qəsdən məhv etmə və ya zədələmə), 221.1 (xuliqanlıq) və başqa maddələrlə ittiham olunur.

Əlavə edək ki, iş adamı olan Ziya Hüseynzadə “PKF Audit Azerbaijan” MMC-yə rəhbərlik edir.