Salyan və Neftçalaya mediatur təşkil edilib

alyan-Neftçala, eləcə də ətraf rayonlarda müşahidə olunan su qıtlığı problemi həll edilmək üzrədir.

Bu barədə Azərbaycan Dövlət Su Ehtiyatları Agentliyi tərəfindən adıçəkilən rayonlara təşkil olunan mediatur çərçivəsində məlumat verilib. Mediatur zamanı bölgənin su təchizatının yenilənməsinə xidmət edən 5 yeni obyekt və layihə ilə tanışlıq keçirilib.

Media nümayəndələri bölgənin aparıcı nasos stansiyalarına baş çəkiblər, Neftçala şəhərinin su təchizatı və kanalizasiya sistemlərinin yenidən qurulması layihəsinin icrası ilə tanış olublar və onlara bu layihələrin bölgənin su təchizatına yaradacağı imkanlar barədə məlumat verilib.

Qeyd edilib ki, Dövlət Su Ehtiyatları Agentliyinin layihəsi əsasında yenicə çəkilən Şirvan-Muğan qrup su kəmərindən Neftçala şəhərinə 38 km uzunluğunda ikinci magistral su kəməri sayəsində Neftçala şəhəri, kənd və qəsəbələrin 80 mindən artıq sakini içməli su ilə təmin olunacaq.

O da bildirilib ki, Şirvan-Muğan qrup su kəmərinin marşrutu boyu yaşayış məntəqələrinin içməli su ilə təmin edilməsi məqsədilə Hacıqabul, Şirvan, Salyan və Biləsuvar şəhərlərində ümumi tutumu 50 min kubmetr olan su anbarları inşa olunub. Bu layihədən perspektivdə 470 min nəfər faydalanacaq.

Kürün əsas qolunda suaşıran bəndlə tanışlıq da jurnalistlərin marağına səbəb olub. Həmçinin 12 aqreqatlı "Akkuşa-2" stasionar nasos stansiyasına baxış keçirilərkən qeyd edilib ki, bu stansiya Salyan rayonunun 11-12 kəndinin əkin və həyətyanı sahələrini su ilə təmin edir.