Şərurlu İsfəndiyarın məhkəmə baxış iclası keçirildi | Məqsədim kömək etmək olub

Böhtan və təhqir maddələri ilə xüsusi ittiham qaydasında məhkəməyə verilən “Şərur MTK”nın sahibi İsfəndiyar Axundovun (Şərurlu İsfəndiyar) məhkəmə baxış iclası keçirilib.

Binəqədi Rayon Məhkəməsinin hakimi Vüsal Tağıyevin sədrliyi ilə keçirilən iclasın ilkin mərhələsində zərərçəkənin vəkili vəsatət təqdim edərək son vaxtlar İsfəndiyar Axundovla bağlı onlarla şikayətin olduğunu bildirərək bu faktların onu xarakterizə edən hal kimi iş materiallarına əlavə edilməsini xahiş edib.

İsfəndiyar Axundovun vəkili isə bütün bunları mətbuatın qarayaxması kimi qiymətləndirərək yalan olduğunu deyib. Məhkəmə vəsatəti təmin etməyib.

Daha sonra təqsirləndirilən İsfəndiyar Axundova sərbəst ifadə üçün söz verilib. O, ittihama görə özünü təqsirli bilməyərək məqsədinin insanlara kömək etmək olduğunu deyib. Qarşı tərəfin vəkilinin suallarını cavablandırmaqda çətinlik çəkməsini isə savadının olmaması ilə əsaslandırıb.

Məhkəmənin növbəti prosesi 5 iyunda keçiriləcək.