Şəxsi məlumatlarınız hər an oğurlana bilər

“Yandex Go” və “Yango” kimi tanınan “Yandex” taksi xidməti sentyabrın 1-dən xarici istifadəçilərin məlumatlarını Rusiyanın Federal Təhlükəsizlik Xidmətinə ötürəcək.

Rusiya KİV-in məlumatına görə, qüvvəyə minəcək yeni qanuna əsasən, günün istənilən saatında Azərbaycanın da daxil olduğu 9 ölkədə fəaliyyət göstərən “Yango” taksi xidmətinin müştərilərinin məlumatlarını əldə etmək mümkün olacaq.

Rusiyanın Baş naziri Mixail Mişustin artıq bununla bağlı qərar imzalayıb. Ehtimal edilir ki, bu addım daha çox siyasi repressiyalardan qaçan, səfərbərlikdən yayınan şəxslərə təsir edəcək.

Məsələ ilə bağlı vəkil Nail İbrahimov bildirib ki, bu qanun ancaq Rusiya ərazisində qüvvədə ola bilər: “Digər ölkələrdə, eləcə də Azərbaycanda vətəndaşların şəxsi məlumatlarının xarici ölkə kəşfiyyatına ötürülməsi qanunsuzdur. Bu, bütün hüquq normalarına və Azərbaycan Konstitusiyasına ziddir. Bunun üçün xidmət orqanlarına rəsmi müraciət ünvanlanmalıdır. Beynəlxalq müqavilə əsasında bu əməkdaşlıq həyata keçirilməlidir”.

Qeyd edək ki, artıq bir sıra ölkələr “Yango” taksi xidmətinə müştərilərin məlumatlarını Rusiyaya ötürməyi qadağan edib. Finlandiya bu şirkətin ölkədəki bütün hesablarını dondurub.