Sürücülərə hava şəraiti ilə bağlı xəbərdarlıq | Diqqətli olun!

Qarlı hava səbəbindən Bakı-Şamaxı yolunun Qobustan rayonu Ceyrankeçməz kəndi ərazisindən keçən hissəsində nəqliyyat vasitələrinin hərəkətindəki çətinlik aradan qaldırılıb.

Bu barədə Azərbaycan Avtomobil Yolları Dövlət Agentliyinin (AAYDA) sözçüsü Anar Nəcəfli məlumat verib.

Bildirilib ki, dərhal əraziyə maşın və mexanizm texnikaları cəlb olunub. Buzlaşmış ərazilərə duz və qumun qarışıq formada səpilməsi ilə hərəkət təmin edilib. Hazırda hərəkətdə problem müşahidə edilmir.

“Axşam saatlarına doğru yenidən şaxtanın olması səbəbindən sürücülərdən xahiş edirik ki, qış fəslinə uyğun olaraq avtomobilini təchiz etməmiş şəxslər dağlıq və dağətəyi yollardan istifadə etməsinlər. Çünki biz nə qədər tədbir görsək də, həmin sürücülərin hərəkətində mütləq şəkildə problem yaranacaq. O problem də digər hərəkət iştirakçılarına maneə törədəcək”, – deyə A.Nəcəfli qeyd edib.