Şuşada azərbaycanlı fotoqraflar üçün master klass keçirildi

İyulun 21-23-də Azərbaycanın mədəniyyət paytaxtı Şuşada Milli Mətbuat Günü münasibətilə “4-cü Sənaye İnqılabı dövründə yeni media” Qlobal Forumu baş tutub.

Forum çərçivəsində yerli fotoqraflar üçün tanınmış rusiyalı fotojurnalist Sergey Kivrin tərəfindən master klass keçirilib. Təlimdə 12 gənc fotoqraf iştirak edib. Sonda master klassda iştirak edən fotoqraflara rusiyalı fotoqrafın imzası ilə sertifikatlar verilib.

Həmçinin Şuşa Qlobal Media Forumu çərçivəsində “Anadolu” Agentliyi tərəfindən televiziya jurnalistləri üçün “Hərbi jurnalistika” mövzusunda təlim keçirilib.

“Anadolu” Agentliyi Akademiyasının müdiri Cahangir İşbilir vəzifə borcunu yerinə yetirən jurnalistlərin müdafiəsi ilə bağlı təcrübələrini bölüşüb.

Videotəqdimatla çıxış edən Akademiya müdiri qeyd edib ki, hərbi jurnalistikada xəbər hazırlamaqla yanaşı, özünümüdafiə də əhəmiyyət daşıyır. O, ilkin tibbi yardım, sürətli avtomobil idarəetmə, bir sıra çevik fiziki hərəkətlər, qaz maskalarından istifadə, partlayışlar zamanı edilməli olan hərəkətlər barədə məlumat verib.

Qeyd edək ki, Şuşada “Heydər Əliyev İli” çərçivəsində və Azərbaycan Milli Mətbuatının 148-ci ildönümü münasibətilə təşkil edilən “4-cü Sənaye İnqilabı dövründə Yeni Media” Qlobal Forumu yekunlaşıb.