Təlim keçməlidirlər, daha sonra bu işlə məşğul olmalıdırlar | Sərnişin

Sürücünün fiziki məhdudiyyətli şəxsin avtobusa daxil ola bilməsi üçün pandusu aça bilməməsi sosial şəbəkədə böyük müzakirələrə səbəb olub.

Görünür ki, köməyə gələn polis əməkdaşları sürücünün öhdəliyində olan vəzifəni yerinə yetirərək pandusu açmağa nail olublar.

Sürücülər bildirirlər ki, onlara işə qəbul olarkən pandusun açılmağı və digər qaydalarla bağlı təlimlər keçirilib.

Daşıyıcı şirkətin Mətbuat Xidmətindən isə bildirilib ki, indiyə qədər panduslarda hər hansı bir problem qeydə alınmayıb. Baş verən hadisə ilə bağlı isə araşdırma aparılır:

“Şirkətimizin istismarında olan müasir tipli avtobusların hər birində panduslar quraşdırılıb. Bununla yanaşı, sürücülərə vaxtaşırı olaraq fiziki məhdudiyyətli şəxslərə xidmət göstərilməsi, pandusların açılıb-bağlanması, fiziki məhdudiyyətli şəxslərin yer aldığı arabaların avtobusa daxil edilməsi, yerləşdirilməsi ilə bağlı təlimatlar verilir və maarifləndirmə tədbirləri həyata keçirilir. Sürücü fiziki məhdudiyyətli şəxsin əlil arabası ilə yaxınlaşdığını gördüyü təqdirdə avtobusu saxladıqdan sonra pandusu açmalı, həmin şəxsi araba ilə birgə avtobusa mindirməli və xüsusi yerdə yerləşdirməlidir. Bəzi hallarda panduslarla bağlı texniki problemlır nəzərə çarpır və bu kimi hallar tərəfimizdən dərhal aradan qaldırılır”. .