Tikinti şirkətləri piyadaların yolunu zəbt edir

Bakıda tikinti şirkətləri piyadaların yolunu zəbt edir.

Belə ki, paytaxtın mərkəzi küçələrindən olan Xaqani və Səməd Vurğun küçələrinin kəsişməsində tikinti şirkəti tərəfindən iş aparılır.

Bu səbəbdən də səkilər bağlıdır. Nəticədə sakinlər məcburiyyət qarşısında qalıb yoldan hərəkət edirlər. Bu isə onların həyatı üçün böyük bir təhlükədir.

Məsələ ilə bağlı Azərbaycan Yerüstü Nəqliyyat Agentliyindən bildirilib ki, bu kimi hallar piyadaların təhlükəsiz, fasiləsiz və rahat hərəkətinə risk yaratmaqla şəhərin piyada mühitinə mənfi təsir göstərir:

“Qeyd edək ki, bu, inzibati məsuliyyət yaradan hallardır. Hesab edirik ki, aidiyyəti qurumlar tərəfindən qanunauyğun qaydada tədbirlər görülməlidir”.

Sözügedən ərazi üzrə yaşanan problemlə bağlı Səbail Rayon İcra Hakimiyyətindən bildirilib ki, məsələ araşdırılacaq.

Təəssüflə qeyd etməliyik ki, səki problemi hazırda Bakının bir çox yerlərində mövcuddur. İnzibati Xətalar Məcəlləsinin 394-cü maddəsində isə qeyd edilir ki, əgər Şəhərsalma və Tikinti Məcəlləsinin tələbləri pozularsa, fiziki şəxslər 300 manatdan 500 manatadək, vəzifəli şəxslər 1500 manatdan 2500 manatadək, hüquqi şəxslər isə 15 min manatdan 25 min manatadək məbləğdə cərimə edilir.