Un bahalaşdı: qiymət artımı çörəyə necə təsir edəcək?

Un yenidən bahalaşmağa başlayıb.

Antiinhisar və İstehlak Bazarına Nəzarət Dövlət Xidmətindən verilən məlumata görə, ölkədə 50 kiloqramlıq məhsulun topdansatış qiyməti bir manata qədər artıb. Qiymət aralığı 26 manat 50 qəpikdən 28 manat 50 qəpiyədək dəyişir.

Bahalaşmaya səbəb ölkəyə gətirilən buğdanın qiymətinin artmasıdır. Belə ki, 2023-cü ilin avqustunda idxal olunan bir ton məhsulun qiyməti 209 ABŞ dollar olduğu halda, sentyabrda bu göstərici 13,7 vahid artaraq 238 dollara çatıb.

Bəs bahalaşma çörəyin qiymətinin artımına səbəb ola bilərmi?

İqtisadçı Xalid Kərimli bildirib ki, unun qiymətinin artması çörəyin qiymətinə təsir göstərməyəcək. Ekspert hesab edir ki, çörək istehsalçıları unun qiymətindəki kiçik artımı gəlirləri hesabına kompensasiya edə bilərlər. Buna səbəb son bir ildə unun qiymətinin 30 faizdən çox enməsi müqabilində çörəyin qiymətinin daha az ucuzlaşmasıdır. Sahibkarlar da bahalaşma barədə düşünmürlər. Çörək istehsalı müəssisələrindən bildirilib ki, unun hazırkı qiyməti artıma əsas vermir.