Uşaq İncəsənət Festivalı davam edir

Mədəniyyət Nazirliyi, Elm və Təhsil Nazirliyi və Heydər Əliyev Mərkəzinin birgə təşkilatçılığı ilə Uşaq İncəsənət Festivalının iyulun 3-dən ikinci – regional mərhələsi keçirilir.

Ümummilli lider Heydər Əliyevin 100 illik yubileyinə həsr olunan tədbir 14 şəhər üzrə 26 məntəqədə təşkil olunub.

Festival çərçivəsində iyulun 7-də Göygöl Milli Parkının ərazisində ikinci mərhələyə vəsiqə qazanan istedadlılar üçün yay düşərgəsi təşkil edilib və uşaqların asudə vaxtlarını səmərəli keçirməsi, iştirakçılar arasında şəbəkələşmənin təmin edilməsi üçün şərait yaradılıb.

Düşərgə müddətində uşaqlar üçün maraqlı və əyləncəli oyunlarla yanaşı, tanınmış mədəniyyət və incəsənət xadimləri tərəfindən ustad dərsləri təşkil edilib.

21 nominasiyada üç yaş qrupu üzrə keçirilən festivala respublikamızın bütün rayon və şəhərlərindən 27 minədək iştirakçı qatılıb.

Festivalın birinci mərhələsi aprel-iyun aylarını əhatə edib. 2-ci mərhələ iyul-avqust aylarında baş tutacaq. Bu mərhələnin qalibləri final mərhələsində iştirak hüququ əldə edəcək.

Final mərhələsinin sentyabr ayında Bakıda keçirilməsi nəzərdə tutulur. Yekunda ən çox nominasiya üzrə iştirak etmiş və fəallıq göstərmiş şəhər və ya rayon növbəti il festivala ev sahibliyi hüququ qazanacaq.