Vahid Əhmədovdan nazirliyə sərt tənqid: deputatlar arasında gərginlik yarandı

"Bölgələrdə vakant iş yerləri hərraca çıxarılır. Amma bu vakant yerlərdə maksimum maaş 300 manatdır".

Bunu Milli Məclisin noyabrın 21-də keçirilən iclasında deputat Vahid Əhmədov deyib.

"Bizdə məlumat var ki, nazirliklərin qurumlarında yüksəkmaaşlı vakant yerlər var, amma hərraca çıxarılmır. Sahibə xanım, bizim Əmək və Əhalinin Sosial Müdafiəsi Nazirliyinə kifayət qədər sualımız var.

Biz istəyirik ki, bir neçə deputat əmək və əhalinin sosial müdafiəsi naziri Sahil Babayevlə görüşək, bəzi məsələləri aydınlaşdıraq ki, mətbuata daşımayaq. İki ay ərzində 48 məktub almışam ki, hamısı bu nazirliklə bağlıdır. Pensiya, ünvanlı sosial yardım, şəhid ailələri, qazilərlə bağlı problemlər var", – deputat bildirib.

Məsələyə reaksiya verən Milli Məclisin sədri Sahibə Qafarova bildirib ki, onların komitələri dinləmələr keçirib: "Sahil Babayev də bu dinləmələrdə iştirak edib. Nazirliyin özü müxtəlif məsələlərlə bağlı dinləmələrdə iştirak ediblər, fəal olublar".

Parlamentin Əmək və sosial siyasət komitəsinin sədri Musa Quliyev isə bildirib:

"Vahid müəllim dedi ki, nazirlə görüşək. İki komitənin birgə iclasında nazir 1 saata yaxın çıxış edib, suallara cavab verib. Sizin qaldırdığınız məsələni hansı mətbuat orqanı üçün deyirsinizsə, hansı populyarlıq üçün bildirirsinizsə, ona da ehtiyacınız yoxdur. Siz ölkədə kifayət qədər populyar adamsınız".