Vətəndaşlar buna görə tora düşür | Diqqətli olun, bank kartlarınız oğurlana bilər

Son günlər sosial şəbəkələrdə onlayn qumar oyunlarının sayı və dolayı yolla reklamları kəskin şəkildə artıb. Bu mərc oyunlarının reklamının təşəkkül tapdığı əsas platforma “Facebook” və “TikTok” sosial şəbəkələridir.

Bu qəbildən olan oyunlarla bağlı araşdırma apararkən onların fantastik şəkildə yayılmasının bir çox səbəblərinin olduğunu görürük. Əvvəlcə onu qeyd edək ki, bu cür “online casino oyunları” uzun illərdir müxtəlif mərc oyunlarını həyata keçirən şirkətlərin veb səhifələri vasitəsilə təqdim edilirdi. Amma sosial şəbəkələrdə kütləvi reklam son vaxtlar daha geniş vüsət alıb.

Daha öncə mərc oyunları əsasən idman yarışlarının üzərində qurulurdusa, pandemiyadan sonra bu oyunları təşkil edən saytlar sanki durğunluq yaşayır. Bunun da səbəbi əksər idman yarışlarının kütləvi təxirə düşməsidir. Bu da bəzi işbazların gəlirlərinə mənfi təsir göstərib. Buna görə də onlar qazanc əldə etmək üçün yeni yollar axtarmağa başlayıblar. Bunun üçün onlayn voleybol, basketbol, futbol oyunları ilə yanaşı, kazino oyunları da təşkil edirlər.

Qumar oyunlarının təşkilatçıları ilə yanaşı, fərdi qaydada kibercinayətkarlıq yolu ilə qazanc əldə etmək isəyən bir çox dələduzlar Azərbaycanda olan sosial şəbəkə istifadçilərinin diqqətini cəlb etmək üçün müxtəlif fırıldaqlardan da istifadə edirlər. Bunlardan biri də tanınmış simaların fotolarından istifadə etməklə, həmin şəxslərin də mərc oyunlarının istifadəçisi, qalibi kimi təqdim edilməsidir.

Qeyd edək ki, kiberdələduzlar sosial şəbəkə istifadəçilərinin diqqətini cəlb etmək üçün saxta bank hesabalarını da reklam edirlər. Onlar müxtəlif bank hesablarına guya qaliblər üçün köçürülmüş minlərlə manatı nümayiş etdirirlər. Halbuki, həmin mesaj və sənədlərin saxta olduğu aydın şəkildə sezilir və bu da qurulan tələnin bir hissəsidir.