Yasamalda bu əraziyə girişi kimlər bağlayıb? - "Dəfələrlə şikayət etmişik, deyirlər ki..." - Baku TV

Baku TV-nin qaynar xəttinə müraciət edən vətəndaş Yasamal rayonu, Əbdürrəhim bəy Haqverdiyev ilə Əhməd Cəmil küçələrinin kəsişməsində yerləşən çoxmərtəbəli yaşayış binasının həyətinə girişin məhdudlaşdırıldığını bildirib.

Qeyd olunub ki, məhəllənin girişinə qanunsuz şlaqbaum quraşdırılıb. Qurğunun pultu yalnız bir neçə sakində olduğundan digər sakinlərin, qonaqların, həmçinin taksilərin əraziyə daxil olmasına maneə yaranır.

Şikayətçi Zaur Nəcəfovun sözlərinə görə, qurğu 2023-cü ilin mart ayında özbaşına quraşdırılıb:

"Məsələ ilə bağlı Fövqəladə Hallar Nazirliyinə və Yasamal Rayon İcra Hakimiyyətinə müraciət etmişdim. Qurumlar tərəfindən müvafiq akt tərtib olundu və şlaqbaum söküldü. Lakin həmin şəxslər qanunvericiliyin tələblərinə məhəl qoymayaraq onu yenidən quraşdırdılar. Dəfələrlə etdiyimiz şikayətlər nəticəsiz qalıb".

Məsələ ilə bağlı aidiyyəti polis orqanından bildirilib ki, ərazidəki məhdudiyyət aradan qaldırılacaq və faktla bağlı tədbir görüləcək.