“Zəng vurdular ki, bu nə söhbətdir?!” | Naibə Allahverdiyevanın başına görün nə gəldi - Baku TV

Kiberdələduzlar artıq tanınmış şəxslərin səslərini süni intellekt vasitəsilə təqlid edərək onların yaxınlarına saxta mesajlar göndərirlər. Məqsəd isə insanları aldadaraq bank kartı məlumatlarını və pul vəsaitlərini ələ keçirməkdir.

Belə kiberdələduzluq cəhdi ilə Xalq artisti Naibə Allahverdiyeva da qarşılaşıb. Naməlum şəxslər aktrisanın səsini süni intellekt vasitəsilə klonlayaraq onun adından sənət dostlarına və tanışlarına səsli mesajlar göndəriblər.

“Dostlarım mənə zəng edib bildirdilər ki, guya mən onlardan kart məlumatlarını istəmişəm, hətta öz səsimlə səsli mesaj da göndərmişəm. Mən isə heç kimə belə bir müraciət etməmişəm. Mənim adımdan və səsimdən istifadə ediblər. Səsi süni intellekt vasitəsilə hazırlayıblar”, – deyə o bildirib.

Dələduzlar inandırıcılığı artırmaq üçün aktrisanın illər əvvəl xəstəxanada çəkilmiş fotosundan da istifadə ediblər. Onun guya yeni əməliyyatdan çıxdığını bildirərək mağazalar şəbəkəsindən pul mükafatı qazandığı barədə saxta məlumat veriblər. Daha sonra həmin “mükafat”ın əldə olunması üçün dostlarının kart nömrələrinin və digər bank məlumatlarının göndərilməsini istəyiblər.

Kibertəhlükəsizlik üzrə mütəxəssislər bildirirlər ki, hazırkı süni intellekt alətləri vasitəsilə insan səsini klonlamaq olduqca asanlaşıb. Tanımadığınız nömrədən gələn zəng zamanı verilən suallara cavablarınız yazıla və həmin səs parçaları sonradan süni intellekt platformalarında istifadə edilə bilər.

Mütəxəssislərin sözlərinə görə, belə hallarda yalnız səsin tanış gəlməsinə və ya zəng edən nömrəyə güvənmək olmaz. Mesajın məzmununa diqqət yetirmək, pul və ya kart məlumatı tələbinin həmin şəxs üçün xarakterik olub-olmadığını müəyyənləşdirmək lazımdır. Şübhəli müraciət daxil olduqda həmin şəxslə başqa əlaqə vasitəsilə birbaşa danışmaq tövsiyə edilir.