70 min fələstinli hepatitə yoluxub

2023-cü ilin 7 oktyabrında başlayan İsrail-HƏMAS savaşı nəticəsində Qəzza zolağında ölənlərin sayı 68 527 nəfərə çatıb, 170 395 fələstinli isə yaralanıb.

Qəzzanın səhiyyə xidmətinin məlumatına görə, son sutka ərzində xəstəxanalara 8 meyit gətirilib, 13 xəsarətalana tibbi yardım göstərilib.

Məlumatda qeyd olunub ki, oktyabrın 10-da atəşkəs əldə olunandan sonra Qəzza zolağında 93 fələstinli həlak olub, 337 nəfər xəsarət alıb.

Tibbi avadanlıqların, lazımi preparatların olmamasına görə yoluxucu xəstəliklər yayılıb. 70 min fələstinli “Hepatit C”dən əziyyət çəkir. Böyrək xəstəlikləri olanların 41 faizi ölüb.

Bildirilib ki, İsrail Ordusu Qəzza zolağına tibbi yardım olan cəmi 9 yük avtomobilini buraxıb. Bu isə hazırkı vəziyyətdə insanlara tibbi yardım göstərmək üçün kifayət deyil.

Ümumdünya Səhiyyə Təşkilatına çağırış edilib ki, İsrailə təzyiqlər artırılsın. Qəzzanın səhiyyə xidmətinin rəsmiləri düşünür ki, yalnız bundan sonra Təl-Əviv tibbi yardımların çatdırılmasına maneə yaratmaz.