700-dən çox şəxs... | İsrailin İrandakı casusları nələri etiraf etdi?

İsrail-İran münaqişəsindən sonra İslam Respublikasının daxilində təhlükəsizlik tədbirləri gücləndirilib.

Rəsmi məlumatlara görə, İsrailin kəşfiyyat orqanları ilə əlaqədə şübhəli bilinən şəxslərə qarşı ölkə boyu geniş əməliyyatlar həyata keçirilib. 13 iyundan bəri 700-dən çox şəxs saxlanılıb.

BBC-nin məlumatına görə, 12 gün davam edən silahlı qarşıdurma zamanı və sonra İsrailə casusluqda ittiham olunan altı nəfər edam edilib. Saxlanılan bəzi şəxslərin dövlət televiziyasında etiraf görüntüləri yayımlanıb.

İran mediasının iddiasına görə isə ölkədə İsrailin casus şəbəkəsi fəallaşıb və bu fəaliyyət nəticəsində yüksəkrütbəli hərbçilər, nüvə alimləri öldürülüb. Kəşfiyyat orqanları həmçinin bəzi vətəndaşlara xəbərdarlıq mesajları göndərərək onların telefon nömrələrinin xarici saytlarda göründüyünü bildiriblər.

Bununla yanaşı, xaricdəki farsdilli media qurumlarında çalışan jurnalistlərin ailə üzvləri ilə bağlı da bəzi addımlar atılıb. İran mediasında yayılan məlumatlara görə, onların yaxın qohumları müvəqqəti saxlanılıb. İnternetə çıxış isə münaqişə dövründə məhdudlaşdırılıb və atəşkəsdən sonra da tam bərpa olunmayıb. Bu, son illər tez-tez rast gəlinən haldır. Hazırda bəzi xəbər saytlarına yalnız VPN vasitəsilə daxil olmaq mümkündür.

Beynəlxalq hüquq müdafiə təşkilatları prosesi yaxından izləyir, İran rəsmiləri isə mövcud tədbirlərin ölkənin təhlükəsizliyinə yönəldiyini vurğulayır.