ABŞ-də aviasiya dispetçerlərinin çatışmazlığı yaşanır?

"ABŞ-də şatdaunun davam edəcəyi təqdirdə, cari rübdə iqtisadi artım iki dəfə azala bilər".

Bunu ABŞ maliyyə naziri Skott Bessent "ABC News" telekanalına verdiyi müsahibədə bildirib.

"Biz şatdaunun iqtisadiyyata təsirini artıq ilk gündən müşahidə edirik, vəziyyət getdikcə pisləşir. ABŞ Prezidenti Donald Trampın dövründə son iki rübdə iqtisadiyyatımız möhtəşəm idi, lakin bəzi qiymətləndirmələrə görə şatdaun davam etsə, bu rübdə iqtisadi artım iki dəfə azala bilər", – deyə o vurğulayıb.

Bu arada, ABŞ-nin müharibə naziri Pit Heqset isə şatdaun fonunda kadr çatışmazlığı səbəbindən hərbi hava dispetçerlərini ölkənin mülki hava limanlarına göndərməyi təklif edib. Bu barədə ABŞ nəqliyyat naziri Şon Daffi məlumat verib.

"ABŞ-nin müharibə naziri Pit Heqset mənə mesaj göndərdi və bildirdi ki, onun bir neçə hava dispetçeri ola bilər və əgər mən onlara istifadə sahəsi tapa bilsəm, onları mənə təklif edəcək. Hələ bilmirəm, istifadə edə biləcəyəmmi, çünki onlar bizim ehtiyac duyduğumuz hava məkanlarında işləmək üçün sertifikatlaşdırılmayıb. Amma əgər mümkün olsa, onları işə cəlb edəcəyəm", – deyə Daffi CNN telekanalına müsahibəsində deyib.

O əlavə edib ki, hazırda ABŞ-də təxminən 2 minə yaxın hava dispetçerinə ehtiyac var və bu vəziyyət hökumət işə başlayandan sonra da davam edəcək.

"Şatdaundan bir gün əvvəl dörd hava dispetçerinin istefasını qəbul etmişdim, indi isə gündə 15-20 nəfər işdən çıxır. Bu səbəbdən şatdaundan sonra dispetçer sayını artırmaq mənim üçün daha çətin olacaq", – deyə Daffi sözlərinə əlavə edib.