Kiyevə dəhşətli hücum | Paytaxtı partlayış səsləri bürüdü - Baku TV

Avqustun 8-də gecə və gündüz saatlarında Ukraynanın paytaxtı Kiyev yenidən kütləvi raket və dron hücumlarına məruz qalıb.

Hava hücumlarının əsas hədəfləri arasında ərzaq mərkəzləri və poçt stansiyaları olub.

Kiyev Şəhər Hərbi Administrasiyasının rəsmisi Yekaterina Pop Baku TV-nin Şərqi Avropa bürosuna bildirib ki, son 24 saat ərzində 18 saat boyunca Ukrayna paytaxtına zərbələr endirilib.

“Paytaxtda həyata keçirilən kombinə edilmiş düşmən hücumu nəticəsində iki nəfər həlak olub. Lakin irəliləyən saatlarda bu say arta bilər. Həmçinin təxminən 20 nəfərin yaralandığı məlumdur. Onlardan səkkizi paytaxtdakı tibb müəssisələrinə hospitalizasiya olunub. İki nəfərin vəziyyəti ağırdır. Digərlərinə ambulator yardım göstərilib.

Təxminən 15 çoxmənzilli bina zədələnib. Ərazilərdə zərərçəkənlərə yardım göstərilməsi üçün qərargahlar yaradılır. Bütün lazımi yardım və məsləhətlər verilir. Fövqəladə Hallar Nazirliyinin psixoloqları da fəaliyyət göstərir.

Həmçinin düşmən paytaxtda çoxsaylı bağça binalarını zədələyir və davamlı həyəcan siqnalları ilə mülki əhalini təhdid etməyə davam edir. Hazırda xilasetmə qüvvələri paytaxtın bir neçə rayonunda hücumun nəticələrinin aradan qaldırılmasını davam etdirir. Yanğınsöndürmə, konstruksiyaların soyudulması və yanğınların lokallaşdırılması işləri aparılır”, – deyə Yekaterina Pop bildirib.

Hadisə nəticəsində evinə ziyan dəyən sakinlərdən biri isə yaşadıqlarını belə ifadə edib:

“Gördüyünüz kimi, belə bir dəhşət baş verib. Mən axşamdan getmişdim, rəfiqəmin qonağı idim. Yaxşı ki, getmişəm. Gecə qonşular zəng edib dedilər ki, bizim evə raket düşüb. Gəlib gördüm, mənzilim bu gündədir. Bu evdə hamı, bütün bina zərər çəkib”.