ABŞ hökuməti qismən dayandırılmış işini bərpa etməyə hazırlaşır

ABŞ Senatı prosedur səsverməsində hökumətin qismən dayandırılmış işini bərpa etməyə və bunu aradan qaldırmağa imkan verəcək qanun layihəsini təsdiqləyib. Qanun layihəsinin lehinə 60, əleyhinə 40 səs verilib.

40 gündür davam edən şatdaun nəticəsində 750 min federal işçi ödənişsiz məzuniyyətə göndərilib. Yoxsulluq səviyyəsində yaşayan 42 milyon amerikalının ərzaq yardımları dayandırılıb.

Hava nəqliyyatında dispetçer problemi yaranıb. Hökumət yalnız hüquq-mühafizə orqanlarının əməkdaşları və miqrasiya xidmətinin işçilərini maliyyələşdirə bilirdi.

Hesablamalara görə, şatdaun ABŞ iqtisadiyyatına 14 milyard dollara yaxın ziyan vura bilər. Hökumət işini bərpa edəndən sonra rəqəmlər dəqiqləşdiriləcək.

Prosedur səsverməsində senatorlar Nümayəndələr Palatasının qəbul etdiyi, 30 yanvar tarixinə qədər hökumətin maliyyələşdirilməsi üçün düzəliş ediləcək və üç tam illik büdcə ayırmaları paketini əhatə edən qanun layihəsini irəli sürdülər. Əgər Senat sonda bu qanun layihəsini qəbul edərsə, paket Nümayəndələr Palatası tərəfindən təsdiqlənməli və imzalanmaq üçün Prezident Donald Trampa göndərilməlidir. Bu proses bir neçə gün çəkə bilər.