ABŞ qoşunlarının çıxarılması İraq kürdlərini niyə narahat edir? - Baku TV

ABŞ qoşunlarının İraqdan çıxarılması qərarı ölkənin şimalındakı Kürdüstan Muxtar Regionunda narahatlıq yaradıb.

Regionun Baş naziri Məsrur Bərzani Amerika hərbçilərinin gedişindən sonra kürdlərin raket və pilotsuz uçuş aparatlarının mümkün hücumları qarşısında müdafiəsiz qala biləcəyini bildirib.

Bəs Vaşinqton niyə qoşunlarını İraqdan çıxarmaq qərarına gəlib?

Siyasi şərhçi Oqtay Qasımovun fikrincə, ABŞ-nin bölgədəki hərbi iştirakını azaltması yeni qərar deyil və bu proses Donald Trampın prezidentliyi dövründə daha da intensivləşib:

“Donald Tramp hələ ilk prezidentlik dönəmində Suriyadan qoşunların çıxarılması ilə bağlı qərarlı olduğunu bəyan etmişdi. İraq məsələsində də eyni yanaşma var. Ölkədən kənarda silahlı qüvvələri saxlamaq kifayət qədər bahalıdır. Bunun əvəzinə daha mobil və çevik qüvvələrdən istifadə etmək daha uyğun hesab olunur”.

Ekspert bildirib ki, ABŞ-nin yeni təhlükəsizlik yanaşması çərçivəsində xaricdəki hərbi qüvvələrin azaldılması və regional tərəfdaşların rolunun artırılması nəzərdə tutulur:

“Bu, sürpriz və gözlənilməz qərar deyil. Əslində, planlı addımdır. ABŞ həm Avropada, həm də Yaxın Şərqdə hərbi qüvvələrinin sayını azaltmaq və yeni doktrina əsasında onların bir hissəsini geri çəkmək istəyir”.

O.Qasımov Kürdüstan Muxtar Regionunun narahatlığının səbəblərinin də başa düşülən olduğunu deyib. Onun sözlərinə görə, regiondakı kürd qruplaşmaları uzun müddət müxtəlif xarici güclərin dəstəyindən yararlanıb:

“Amerika qoşunları çəkiləndən sonra onlar üçün müəyyən problemlərin yaranacağından narahatdırlar. Lakin hesab edirəm ki, İraq mərkəzi hökuməti, Türkiyə və digər ölkələrlə münasibətlər normal saxlanılarsa, ciddi problem yaranmaya bilər”.