Avropa ilə Rusiya arasında münasibətlərdə son hədd
Qərbin Ukrayna cəbhəsinə qoşun göndərməklə bağlı mesajları Vladimir Putinin əsəblərini tarıma çəkib.
Belə ki, Rusiya Prezidenti ölkəsinin Federal Məclisinə ənənəvi illik müraciəti zamanı Avropanı və NATO-nu hədəf alan sərt bəyanatlar verərək Qərbi nüvə silahı ilə təhdid edib.
Digər tərəfdən NATO-nun Rusiya sərhədlərinə yaxınlaşmasından narahatlığını açıq ifadə edərək İsveç və Finlandiyanın Alyansa üzv olacağı təqdirdə ölkənin qərb sərhədinə yüksək texnika ilə təmin olunmuş qoşun göndərəcəyini söyləyib. Bildirib ki, Rusiyaya güc tətbiqi xəyalına düşməyə cəhd edən hər kəs İkinci Dünya müharibəsindən daha ağır nəticələrlə üzləşəcək.
Məsələ ilə bağlı Baku TV-yə açıqlama verən politoloq Zaur İbrahimli bildirib ki, V.Putinin müraciəti daha çox Rusiyanın yenidən nüvə silahına müraciət edəcəyinin ön plana çıxarılması ilə yadda qalıb:
“Bu da təsadüfi deyil, çünki bundan əvvəl Qərb də Ukraynaya qoşun göndərəcəyi ilə bağlı çıxışlar edirdi. Bu, Rusiya üçün arzuolunmazdır. Ukrayna cəbhəsində böhran yaranıb. Qərb ölkələri bu böhranı aradan qaldırmağın yollarından biri kimi öz hərbi birləşmələrini Ukraynaya göndərməkdə görürlər. Bu baxımdan Kreml yenidən vəziyyəti gərginləşdirərək Avropanı seçim qarşısında qoyub”.