Avropa Komissiyasından Yaxın Şərqdə müharibənin başlaması ilə bağlı xəbərdarlıq

Avropa Komissiyasının vitse-prezidenti Cozef Borrel Yaxın Şərqdə yeni müharibənin başlayacağı barədə xəbərdarlıq edib.

Diplomat iddia edib ki, Livan və İsrail arasında yenidən baş qaldıran gərginlik genişmiqyaslı müharibəyə çevrilə bilər.

“Bu gərginliyin necə yarandığını bilirik. “Hizbullah” İsraildən yüksəkrütbəli komandiri Fuad Şükrün öldürülməsinə görə intiqam alır. Tərəflər arasında artan gərginlik bütün regiona və dünya ölkələrinə də təsirsiz ötüşməyəcək. Silsilə müharibələr bu yorğun dünyaya lazım deyil”, – deyə Cozef Borrel bildirib.

Xatırladaq ki, bir müddət əvvəl İsrailin kütləvi informasiya vasitələri ölkənin Müdafiə Ordusunun təhdidlərin artması bəhanəsi ilə regionda genişmiqyaslı hərbi əməliyyatlar keçirməyi planlaşdırdığı barədə xəbərlər yayıb.