Avstriyanın keçmiş XİN rəhbəri Putinlə bağlı xatirələrindən danışdı

Rusiya Prezidenti Vladimir Putinin toyunda rəqs etdiyi Avstriyanın keçmiş xarici işlər naziri Karin Knaysl artıq ölkəsini tərk edərək Rusiyada yaşamağa qərar verib.

Bu barədə sabiq nazir Karin Knaysl “Vidsboku”ya müsahibəsində deyib.

O bu günlərdə Rusiya Federasiyasında məskunlaşdığı Ryazan vilayətinin Petruşovo kəndində keçirilən şənlikdə iştirak edib.

2017-2019-cu illərdə Avstriya xarici işlər naziri vəzifəsində çalışan Karin Knaysl müsahibəsində deyib ki, üç il əvvəl Avstriyanı tərk etməyə məcbur oldu: “Fransada işləməyə icazə vermədilər, hətta bank hesabı açmaqdan belə imtina etdim. Qorxdum və Avropadan qaçmalı oldum. Məni heç yerə qəbul etmədilər. Ərəb dilini bildiyim üçün Livana getdim. Rusiyada qalmaq üçün mənə kömək lazım idi. Yaşayış yeri tapmaqda mənə kömək edə biləcək bir neçə insanla əlaqəm var idi. Onlar mənə rus dilini öyrənməyə kömək etdilər. Mən səkkiz dil bilirəm, amma rus dilini təəssüf ki, yenicə öyrənməyə başlayıram”, – sabiq nazir qeyd edib.

Rusiyaya köçdükdən sonra V.Putinlə görüşüb-görüşmədiyinə gəldikdə Karin Knaysl deyib ki, onu sonuncu dəfə 2019-cu ildə görüb.

“Bura gəlmək asan deyildi, amma yolumu tapmağa çalışıram. Mən buranı bəyənirəm. İşə başladım, öyrətməyə və öyrənməyə davam edirəm, kitablarımı yazıram, dil öyrənirəm. Köhnə həyatımı tərk etməli, hər şeyi yenidən başlamalı oldum və 60 yaşda bu, asan deyil”, – siyasətçi bildirib.