Belqoroddan özəl görüntülər yayılıb
Rusiyanın RTR telekanalı Ukrayna ilə həmsərhəd Belqorod vilayətindən çəkilmiş görüntülər yayımlayıb.
Bildirilib ki, Belqorodda döyüşlər başlayandan səkkiz nəfər qəlpə və güllə yarası ilə xəstəxanaya yerləşdirilib. Onlardan biri Olesya Şmatkodur. O, qolundan və qarın nahiyəsindən güllə yarası alıb və hazırda xəstəxanada müalicə olunur.
"Həyat yoldaşım “atəş açma, maşında uşaqlar var” deyə qışqırmağa başladı, amma onlar buna məhəl qoymadan atəş açmağa davam etdilər və məni vurdular. Uşaqlar qışqırırdı, çox qorxmuşdular", – deyə o qeyd edib.
Hücum zamanı evləri dağılan yerli sakinlərə yeni mənzillərin açarları verilib.
Xatırladaq ki, Rusiya tərəfi mayın 22-dən Belqoroda başlayan hücumlarda Ukraynanı günahlandırır. Rəsmi Kiyev isə bütün ittihamları rədd edərək hücumun arxasında Rusiyanın Azadlığı Legionu və “Rus Könüllüləri Korpusu”nun olduğunu bildirib.