“Böyük Sentosa” adlı nəhəng turizm zonası yaradılacaq

Sinqapur hakimiyyəti əyləncə adası Sentosa və ona bitişik Pulau Brani adasının genişləndirilməsini nəzərdə tutan irimiqyaslı yenidənqurma layihəsini təqdim edib.

Plana əsasən, hər iki ada "Böyük Sentosa" adlı nəhəng turizm zonasına çevriləcək.

Layihəyə əsasən, yeni turizm məkanının ildə 32 milyon turist qəbul etməsi planlaşdırılır. Bu isə hazırda Sentosaya gələn orta illik turist sayından təxminən iki dəfə çoxdur.

Sənədə görə, Sentosadakı İmbia dağının zirvəsinə qədər piyada cığırı salınacaq. Zirvədə isə restoranlar, mağazalar və küləkdən qorunan tədbir meydançalarının yerləşəcəyi müşahidə platforması istifadəyə veriləcək.

Bundan əlavə, Sentosanı Pulau Brani ilə birləşdirəcək nəqliyyat qovşağının tikintisi, bir sıra yeni turizm obyektlərinin yaradılması və çimərliklərin yenidən qurulması nəzərdə tutulur. Yeni layihələrin bir hissəsinin 2030-cu illərin əvvəllərində istifadəyə verilməsi planlaşdırılır.

Qeyd olunur ki, Sinqapur əsas adasının ərazisini dənizin doldurulması yolu ilə mərhələli şəkildə genişləndirir. Bunun üçün ölkə digər dövlətlərdən torpaq alır. Nəticədə Sinqapurun quru sahəsi 1960-cı illərdəki 581 kvadratkilometrdən 2025-ci ilin iyun ayına olan məlumata görə 736,3 kvadratkilometrə yüksəlib və artmaqda davam edir.

Layihədə bildirilir ki, yeni istirahət və əyləncə məkanlarının yaradılmasında məqsəd "Sentosa"nın qlobal şəhərdə yerləşən ada kurortu və istirahət mərkəzi kimi cəlbediciliyini daha da artırmaqdır.