Bu işçilər heç bir iş görmədən maaş alır | Süni intellekt sahəsində gərgin rəqabət

27 aprel 2025 463 baxış

Süni intellekt sahəsində gərgin rəqabət şəraitində "Google" bacarıqlı mütəxəssislərini saxlamaq üçün qeyri-adi üsula əl atıb.

"Business Insider" xəbər verir ki, Böyük Britaniyada yerləşən "DeepMind" şöbəsi işçilərinə heç bir iş görmədən maaş verir. Bununla da onların rəqib şirkətlərə keçməsinin qarşısını alır.

"Google" süni intellekt sahəsində əsas mütəxəssislərin rəqiblərə qoşulmasının qarşısını almaq üçün "rəqabət qadağası" sazişlərindən istifadə edir. Bu sazişlər işçilərə bir ilə qədər digər şirkətlərdə işləməyi qadağan edir. Nəticədə, "DeepMind"ın bəzi işçiləri "Google"dan maaş alır, lakin sazişin müddəti ərzində şirkətdə heç bir iş görmürlər.

Məhdudiyyətlərin müddəti işçinin vəzifəsindən və tədqiqat laboratoriyasındakı işinin əhəmiyyətindən asılıdır.

Qeyd edək ki, ABŞ-də Federal Ticarət Komissiyası əksər şirkətlərə "rəqabət qadağası" sazişlərindən istifadəni qadağan edib. Lakin bu qadağa "DeepMind"ın London qərargahına şamil edilmir.

#Google şirkəti