Bundan sonra belə olmayacaq | Netanyahudan sərt açıqlama

Bayden Administrasiyası Livana qarşı müharibə ilə bağlı İsrailə xəbərdarlıq edib.

Bildirilib ki, yeni müharibənin başlaması İranın müdaxiləsi ilə nəticələnə bilər. Lakin administrasiya onu da hesab edir ki, Qəzzada atəşkəs olmadan Livan-İsrail sərhədindəki gərginlik ortadan qalxmayacaq.

İsrail rəsmiləri isə vurğulayıb ki, “Hizbullah” hərbi qruplaşması ilə potensial müharibə Təl-Əviv üçün baha başa gələcək. “Hətta HƏMAS ilə müharibədən sonra hərbi resursların tükənməsi ehtimalı baş verərsə, çox güman ki, tərəflər arasında razılaşma əldə olunacaq. Qərar qəbul etməzdən əvvəl biz bunu dərk etməliyik”, – deyə rəsmilərdən biri qeyd edib.

Livanla potensial müharibənin gözlənildiyi bir vaxtda İsrailin Baş naziri Benyamin Netanyahu isə ölkəsinə qarşı edilən təzyiqlərə baxmayaraq, yolundan dönməyəcəyini açıqlayıb.

“Mən indicə Mərkəzi Komandanlıqda vəziyyətin qiymətləndirilməsi prosesini həyata keçirdim. İsrail dövləti bir çox cəbhələrdə gərgin bir şəraitdə döyüşür. Biz cənubda da, şimalda da mübarizə aparırıq, hətta İudeya və Samariyada da əlimizdən gələni edirik. Bunu da qeyd edim ki, biz bütün bunları ölkəmizə qarşı beynəlxalq təzyiqlərin göstərildiyi bir zamanda həyata keçiririk. Mən yalnız bir məsələyə zəmanət verə bilərəm. O da belədir ki, bundan əvvəl nə baş veribsə, bundan sonra belə olmayacaq. Biz bu reallığı dəyişdirəcəyik. Mən əsgərlərimizə, komandirlərimizə və təhlükəsizlik qüvvələrimizə arxayınam”, – B.Netanyahu əlavə edib.