Dron qalmaqalı böyüyür: Litva NATO dəstəyi ilə HHM sistemini gücləndirir

Rusiya dronlarla Polşaya hücum ittihamlarını təkzib edib.

Vladimir Putinin mətbuat katibi Dmitri Peskov hadisə ilə bağlı suala Müdafiə Nazirliyindən cavab verildiyini və əlavə şərhə ehtiyac olmadığını bildirib.

Xatırladaq ki, Rusiya Müdafiə Nazirliyi sözügedən PUA-ların maksimum uçuş məsafəsi barədə məlumat verərək, dronların Ukraynadan Belarus ərazisi ilə Polşaya çata bilməyəcəyinə eyham vurub. Həmçinin Polşanın Müdafiə Nazirliyi ilə məsləhətləşmələrə hazır olduqlarını açıqlayıb.

Polşanın Baş naziri Donald Tusk isə hava məkanını pozan dronların hücum məqsədi daşıdığını bildirib.

Kremlin sözçüsü isə Varşavanın ritorikasını digər Qərb ölkələrindən səsləndirilən bəyanatlara bənzədib.

O ki qaldı Rusiya-Belarus hərbi təlimlərinə, “bu, heç bir ölkəyə qarşı yönəlməyib” deyən Peskov toplanışı iki ölkənin əməkdaşlığı ilə izah edib.

NATO və Avropa İttifaqı isə Kremlin “dron məsumluğu”na inanmır. Hətta müyyən Şərqi Avropa, Baltikyanı ölkələrin müdafiəsini gücləndirmək niyyətindədir.

“Alyans Ukraynaya PUA hücumları barədə Litvanı məlumatlandırır. Litvanın hava məkanını poza biləcək dronlar izlınilir. Bu işlər “Vilnüs qalxanı” proqramı çərçivəsində görülür. Ehtiyac olarsa, NATO reaksiya verəcək”, ‒ deyə NATO-nun Avropadakı Birləşmiş Qüvvələrinin baş komandanı Aleksus Qrinkeviç bildirib.

Litvanın müdafiə naziri Dovile Şakalene isə etiraf edib ki, Polşanın hava məkanın pozulması Litvada da narahatlıq yaradıb.