Əsədin yeraltı həbsxanasında görün nələr baş verib? | Dəhşətli görüntülər

Suriyada 61 il hakimiyyətdə olan “Bəəs” rejiminin süqutundan, Prezident Bəşər Əsədin devrilməsindən sonra müxalifət qüvvələri dəhşətli işgəncələri səbəbindən “İnsan qəssabxanası” kimi tanınan Sednaya həbsxanasını da ələ keçiriblər.

İşgəncə ocağı Suriya müdafiə nazirinin tabeliyində olub, Suriya Hərbi Polisi tərəfindən idarə olunurdu.

Dəməşq yaxınlığında yerləşən hərbi həbsxananı böyüklüyünə görə kompleks adlandırmaq olar. Sednaya həbsxanasının tikintisi 1981-ci ildə başlayıb və 1986-cı ildə başa çatıb.

Həbsxana minlərlə həm mülki şəxslərin, həm də müxalifətçilərin, eləcə də siyasi məhbusların saxlanılması üçün istifadə edilib.

Suriya İnsan Haqları Müşahidə Qrupu ölkədə vətəndaş müharibəsi başlayandan bəri Sednayada 30 000 məhbusun işgəncə, pis rəftar nəticəsində öldürüldüyünü, kütləvi edamlar yolu ilə həyatlarına son verildiyini təxmin edir.

Təkcə 2011-ci ilin martından 2024-cü ilin dekabrına qədər ölkə həbsxanalarında 3 698-i uşaq, 8 504-ü qadın olmaqla 136 614-dən çox insan saxlanılıb. Bəzi uşaqlar elə orada dünyaya gəlib. Onlar həbsxana mühafizəçiləri tərəfindən qadınlara təcavüz edilməsi nəticəsində doğulub. Hətta uşaqlar və kişilər də cinsi təcavüzə məruz qalıblar.