Hadisə Türkiyə sahillərində baş verib

Qara dənizdə Rusiyaya məxsus olduğu deyilən “MIDVOLGA-2” gəmisinə hücum edilib.

Bu barədə Türkiyə Respublikasının Nəqliyyat və İnfrastruktur Nazirliyi məlumat yayıb.

Bildirilib ki, Türkiyə sahilindən 80 mil aralıda Rusiyadan Gürcüstana günəbaxan yağı daşıyan “MIDVOLGA-2” tankerinə hücum olub.

“13 heyət üzvündən heç kim xəsarət almayıb və gəmi kömək istəməyib”, – deyə məlumatda bildirilib.

Rusiya mətbuatında verilən məlumatlarda isə qeyd olunub ki, gəmiyə hücum PUA vasitəsilə həyata keçirilib. Hücum nəticəsində gəminin üst hissələrinə kiçik ziyan dəyib, lakin heç kim xəsarət almayıb.

“Dekabrın 2-si saat 08:00-da Qara dənizdə “MIDVOLGA-2” Rusiya gəmisinə PUA hücumu olduğu barədə məlumat daxil olub. Gəmiyə kiçik ziyan dəysə də, su sızması baş verməyib”, – deyə məlumatda qeyd edilib.

Əlavə edilib ki, gəmi sərbəst şəkildə Sinop limanına doğru hərəkət edib, xəsarətalan yoxdur.

Açıq mənbələrin məlumatına görə, 140 metrlik “MIDVOLGA-2” gəmisi 2014-cü ildə tikilib və Rusiya bayrağı altında üzür. Böyük Sankt-Peterburq limanında qeydiyyatdadır, sahibi isə Moskvada yerləşən “Srednevoljskaya” gəmiçilik şirkətidir.