Hanoyun qəlbində azadlıq uğrunda mübarizənin ağrılı izlərini yaşadan həbsxana - Baku TV
Yeniliklərdən dərhal xəbərdar olun
Hanoyun mərkəzində, müasir şəhər həyatının axarında, divarları bir zamanlar ağır iztirablara şahid olmuş tarixi məkan var. Bura Hoa Lo həbsxanasıdır.
Bu gün muzey kimi fəaliyyət göstərən məkan Vyetnamın müstəmləkəçilik dövrünü, azadlıq və müstəqillik uğrunda mübarizəsinin ağrılı səhifələrini yaşadır.
XIX əsrin sonlarında fransız müstəmləkəçiləri tərəfindən inşa edilən həbsxana əsasən siyasi məhbusların saxlanılması üçün nəzərdə tutulmuşdu. Burada Vyetnamın müstəqilliyi uğrunda mübarizə aparan insanlar həbs edilir, ağır şəraitdə saxlanılırdı. Dar kameralar, qandallar, işgəncə vasitələri və məhbusların həyatını əks etdirən eksponatlar həmin dövrün acı reallığını göz önünə gətirir.
Hoa Lo yalnız Fransa müstəmləkəçiliyi dövrünün deyil, Vyetnam müharibəsinin də yaddaş məkanlarından biridir. 1960-1970-ci illərdə burada Şimali Vyetnamda əsir götürülmüş amerikalı hərbi pilotlar saxlanılıb. ABŞ hərbçilərinin “Hanoy Hiltonu” adlandırdığı bu həbsxanada əsir düşənlər arasında sonradan senator olmuş Con Makkeyn də var idi.
Bu gün muzeyin ekspozisiyaları, fotoşəkillər, sənədlər və qorunub saxlanılan tarixi əşyalar ziyarətçilərə Vyetnamın keçmişini fərqli tərəflərdən tanımağa imkan verir. Həbsxananın böyük hissəsi sonradan sökülsə də, qorunan bölməsi tarixin canlı şahidi kimi fəaliyyətini davam etdirir.
Azərbaycan media nümayəndələrinin bu məkana səfəri də Vyetnamın tarixini, xalqın müstəqillik uğrunda mübarizəsini və milli yaddaşında xüsusi yer tutan hadisələri yaxından tanımaq baxımından əhəmiyyətlidir.
Hoa Lo sadəcə keçmiş həbsxana deyil. Bu, Vyetnamın ağrılarını, mübarizəsini və azadlıq uğrunda iradəsini yaşadan tarixdir.
#Vyetnam teqi istifadə olunub
- İki ölkə arasında tərəfdaşlığın yeni imkanları və perspektivləri - Baku TV
- Azərbaycanla Vyetnam beynəlxalq strukturlar çərçivəsində də fəal əməkdaşlıq edirlər | İlham Əliyev
- Prezident İlham Əliyev Azərbaycan-Vyetnam əlaqələrindən danışdı - Baku TV
- Gələn il biz diplomatik əlaqələrin qurulmasının 35-ci ildönümünü qeyd edəcəyik | İlham Əliyev
- Mehriban Əliyeva və No Fon Li Hanoyda İrs Evində olublar - Baku TV
