Hərbçiləri kimlər girov götürdü? - Boliviya Prezidenti təcili açıqlama verdi

Boliviyanın keçmiş prezidenti Evo Moralesin tərəfdarları Koçabamba departamentində hərbi hissəni ələ keçirib və hərbçiləri girov götürüblər.

Ölkənin hazırkı prezidenti Luis Arse bildirib ki, Moralesin tərəfdarları 3 hərbi obyekti ələ keçiriblər.

“Hərbçiləri, qohumlarını girov götürüblər və onları öldürməklə hədələyirlər”, – deyə dövlət başçısı bildirib.

Luis Arse qeyd edib ki, hərbi obyektlərin ələ keçirilməsi dünyanın istənilən yerində dövlətə xəyanət və konstitusiya quruluşuna qəsd kimi qiymətləndirilir.

Boliviyanın sabiq prezidenti Evo Morales isə tərəfdarlarını yolları bağlamağa çağırıb, daha sonra hökumət etirazçılarla danışıqlar aparana qədər aclıq aksiyasına başlayıb.

Polis hərbçilərin dəstəyi ilə Koçabamba departamentində keçmiş prezidentin tərəfdarlarının dağıdılmasına başlayıb. Ölkənin müxtəlif bölgələrini birləşdirən avtomobil yollarının bağlanması artıq 19 gündür davam edir.

Prezident Luis Arse oktyabrın 30-da bildirib ki, ziyan 1,7 milyard dolları ötüb, toqquşmalarda 60-dan çox polis əməkdaşı xəsarət alıb.