İrana qarşı sanksiyaların müddəti daha bir il artırıldı

ABŞ Prezidenti Donald Tramp İrana qarşı sanksiyaların müddətini daha bir il uzatmaq barədə qərar qəbul edib.

Bu barədə ABŞ liderinin bəyanatında deyilir.

Tramp vurğulayıb ki, ABŞ-nin İranla münasibətləri hələ normallaşmayıb, amma 19 yanvar 1981-ci ildən ikitərəfli razılaşmaların icrası prosesi hələ reallaşdırılma mərhələsindədir.

Söhbət ABŞ və İran arasında Əlcəzair razılaşmasından gedir. Onlar 1979-cu il inqilabından sonra Tehranda bir ildən çox girovluqda qalan amerikalı diplomatların azad edilməsinə səbəb olub.

14 noyabr 1979-cu ildə ABŞ-nin 39-cu prezidenti Cimmi Karter Tehranda amerikalı girovların ələ keçirilməsinə cavab olaraq 12170 saylı İcra Sərəncamı imzalayıb.

ABŞ Maliyyə Nazirliyinə İranın ABŞ-dəki bütün rəsmi aktivlərini, o cümlədən Amerika banklarındakı hesablarını dondurmaq əmri verilib. Bu faktiki olaraq İrana qarşı ilk cəza iqtisadi tədbirlərinin tətbiqi ilə əlamətdar olub.

1980-ci il aprelin 7-də Karter Tehranla diplomatik əlaqələri kəsib və ABŞ-nin İrana bütün ixracatını, o cümlədən ərzaq və dərmanları qadağan edib. Bundan sonra İrandan ABŞ-yə bütün idxal mallarına embarqo və amerikalıların İrana səyahətinə qadağa qoyulub.