İsrail bazalarının görüntüsü yayıldı | Yaxın Şərqdəki gərginlik pik həddə

İsrail PUA-larını zenit raketləri ilə vurmağa çalışan İran hərbçiləri öldürülüb.

Bunu İsrailin Müdafiə Ordusunun briqada generalı Effi Defrin deyib.

O, iranlı general Əli Şadmaninin öldürülməsi xəbərini də təsdiqləyib və onun əvəzinə təyin olunacaq şəxsə bu barədə yaxşı düşünməyi məsləhət görüb.

İsrailin strateji bazalarının görüntüsü yayılıb. “Mehr News”da yayılan məlumata görə, İrana hücumlar həmin nöqtələrdən icra edilir.

Bununla yanaşı, iranlı generallar İslam Respublikasının raket bazalarının vurulması ilə bağlı İsrailin iddiasını təkzib edib.

Bildirilib ki, İranın raket bazalarının fəaliyyəti davam edir və İsrailə hücumlarda hələ yeni silahlardan istifadə olunmayıb. Növbəti hücumlar zamanı yeni raketlər də işə salınacaq.

“İranda atəşkəs axtardığım barədə danışmamışam. ABŞ daha çox İranın nüvə probleminin yekunlaşmasını istəyir”.

Bunu ABŞ Prezidenti Donald Tramp “Air Force One” təyyarəsinin göyərtəsində jurnalistlərə deyib.

“Baş verənlərin sonu yalnız o halda gələ bilər ki, İran nüvə silahından tam imtina etsin. İran isə nüvə silahı yaratmağa çox yaxındır”, – deyə D.Tramp bildirib.