İsrail “Hizbullah” hədəflərinə qarşı silsilə hücumlara başlayıb

İsrail Müdafiə Qüvvələri Livanın cənubunda "Hizbullah"ın elit Radvan qüvvələrinə məxsus infrastruktur və silah anbarlarına bir sıra hava hücumları həyata keçirib.

Bu barədə "The Times of Israel" qəzeti ordunun mətbuat xidmətinə istinadən məlumat yayıb.

"Hizbullah" Livanın cənubundakı terror infrastrukturunu yenidən qurmaq səylərini davam etdirir və İsrail dövlətinə zərər vermək üçün Radvan qüvvələrinin imkanlarını bərpa etməyə diqqət yetirir", – deyə məlumatda bildirilir.

İsrail Müdafiə Qüvvələri həmçinin qeyd edib ki, hücumlar nəticəsində mülki şəxslərə dəyən ziyanı minimuma endirmək üçün tədbirlər görüb.

Hərbçilərin sözlərinə görə, silah anbarları mülki əhalinin yaşayış mərkəzində yerləşirdi və "Hizbullah"ın mülki şəxslərdən canlı qalxan kimi istifadə etməsinin başqa bir nümunəsi idi.

İsrailin hücumları Livanda xalqın öz evlərini tərk etməsinə səbəb olub. İsrailin “Hizbullah” hədəflərinə hava hücumlarının başlamasından sonra Livanın cənub bölgələrinin sakinləri evlərini tərk edərək daha təhlükəsiz bölgələrə köçürlər.

Məlumata görə, avtomobil karvanları cənub magistral yolu boyunca şimala doğru hərəkət edir.