İturidə Ebola və ərzaq böhranı minlərlə insanı risk altında qoyur

Birləşmiş Millətlər Təşkilatının Ümumdünya Ərzaq Proqramı Konqo Demokratik Respublikasının şərqində tüğyan edən Ebola epidemiyası ilə bağlı həyəcan təbili çalıb.

Qurum böhranın qarşısını almaq üçün bölgəyə təcili humanitar ərzaq yardımının çatdırılmalı olduğunu bəyan edib. Bu barədə "BMT Xəbərləri" portalı məlumat yayıb.

Bildirilir ki, Ümumdünya Ərzaq Proqramının Konqo Demokratik Respublikası üzrə ölkə direktoru Devid Stivenson regional epidemiya ilə bağlı mühüm açıqlamalar verib.

O vurğulayıb ki, ölümcül virusa qarşı mübarizə yalnız tibbi müdaxilə və səhiyyə xidmətləri ilə məhdudlaşmamalıdır.

Direktorun sözlərinə görə, davam edən silahlı münaqişələr, kütləvi köçkünlük və kəskin qida çatışmazlığından əziyyət çəkən yerli icmaların epidemiya qarşısında tab gətirməsi üçün ərzaq təhlükəsizliyi mütləq təmin edilməlidir.

Ölkə direktoru İturi əyalətindəki humanitar fəlakətin miqyasını rəqəmlərlə diqqətə çatdırıb. Bildirib ki, hazırda bölgədə 500 mindən çox insan aclıqla üz-üzədir.

Mövcud qida böhranının epidemiya ilə mübarizə tədbirlərini iflic etdiyini deyən Stivenson xüsusilə nəqliyyat və təhlükəsizlik baxımından çətin əli çatan ucqar ərazilərə humanitar yardımların fasiləsiz ötürülməsinin vacibliyini qeyd edib.