Karbonla zəngin yeni dünyalar kainat haqqında təsəvvürləri dəyişə bilər

Süd Yolu qalaktikasında yerləşən ekzoplanetlər quruluşu və kimyəvi tərkibinə görə bir-birindən ciddi şəkildə fərqlənir.

Alimlərin sözlərinə görə, bu planetlər arasında Yerə bənzər, dəmir və silikatlardan təşkil olunan səmavi cisimlərlə yanaşı, tamamilə fərqli quruluşa malik dünyalar da mövcuddur.

Bəzi ekzoplanetlərin Uran və Neptun kimi əsasən buzlardan, digərlərinin isə Yupiter və Saturnda olduğu kimi hidrogen və heliumdan təşkil olunduğu ehtimal edilir.

Bundan başqa, Süd Yolunda səthi qlobal okeanlarla örtülmüş və tərkibinin təxminən yarısı su, yarısı isə dağ süxurlarından ibarət “okeanidlər”in olduğu da müəyyənləşib.

Tədqiqatçılar Günəş sistemindəki planetlərdən daha fərqli və qeyri-adi kimyəvi quruluşa malik ekzoplanetlərin də mövcud ola biləcəyini düşünürlər.

Ehtimala görə, bəzi belə dünyalar karbonla zəngin ola və onların tərkibində Yer planetindəki silikatlardan fərqli olaraq karbid birləşmələri üstünlük təşkil edə bilər.

Alimlər bildirirlər ki, ekzoplanetlərin kütləsi, ölçüləri və temperaturu ilə yanaşı, kimyəvi tərkibinin öyrənilməsi də onların necə formalaşdığını və hansı xüsusiyyətlərə malik olduğunu anlamaq baxımından mühüm əhəmiyyət kəsb edir.