Süd Yolu qalaktikasının ən sürətli ulduzu aşkar edildi

Almaniyanın Maks Plank Fizika İnstitutunun astronomları Süd Yolu qalaktikasında indiyədək məlum olan ən sürətli ulduzu kəşf ediblər.

S301 adlandırılan ulduz Avropa Cənub Rəsədxanasının Böyük Teleskop-İnterferometri vasitəsilə aşkar olunub.

S301 kütləsi Günəşin kütləsindən 4 milyon dəfə çox olan Oxatan A* qara dəliyinin ətrafında saniyədə 25 min kilometr sürətlə hərəkət edir. Bu, kommersiya təyyarəsinin sürətindən təxminən 100 min dəfə çoxdur və S301-i Süd Yolunda sürət rekordçusu edir. O, əvvəllər müşahidə edilmiş digər ulduzlardan daha çox qara dəliyə yaxınlaşır.

Maks Plank İnstitutunun doktorantı və tədqiqatın müəllifi Feliks Manq bildirib ki, ulduz Oxatan A* ətrafında çox dar orbit üzrə hərəkət edir və tam dövrünü cəmi 8 il 7 aya başa vurur. Qara dəliyə Yer kürəsi ilə Günəş arasındakı məsafədən 12 dəfə böyük məsafəyədək yaxınlaşır.