Kərim Təkin öləcəyini necə hiss etdi və kimə dedi? - RETRO BAKU

“Kar Beyaz” mahnısı ilə yaddaşlarda qalan Türkiyənin məşhur və sevilən müğənnisi Kerim Tekin də gənc yaşda həyatını itirən sənətçilərdən olub. O, 23 yaşında avtomobil qəzası nəticəsində həlak olub.

Kerim Tekin bir milyonu keçən albom satışı ilə 90-cı illərdə iz qoyan sənətçilərdən biri idi.

Afyonda 1998-ci ildə hər il təşkil edilən “Sandıklı Termal'98” konsertinə qatılacaq sənətçilər arasında Kerim Tekin də yerini alır.

İyunun 26-da axşam maraqla gözlənilən konsertinə gedir, mahnılarını ifa edir, daha sonra səhnə arxasına keçir. Bütün sənətçilər səhnə arxasında gözləyərkən tələsik ən yaxın dostlarından birinin toyu olduğunu deyən Kerim müsahibədən dərhal sonra ora getmək üçün meneceri Halis Bütünleylə icarəyə götürdüyü avtomobillə yola düşür. K.Tekin sükanda idi.

Gecə saat 00:15 radələrində çınqıl işləri aparılan yolda qarşıdan gələn iki yük maşını toqquşur. Toqquşmadan bir az sonra yük maşınının biri yerə aşaraq onun düz arxasında olan Kerimin idarə etdiyi avtomobilin üzərinə düşür.

Yük maşını aşanda onun meneceri Halis böyük sürətlə yan düymələri çəkərək Kerimin və özünün oturacağını arxaya əyir. Sonra Halis “Yaxşısanmı?” deyə soruşur, sənətçi “Yaxşıyam, heç bir problemim yoxdur” deyir. Halis yuxarı qalxaraq kömək istəyir və həmin dəqiqələrdə Kerim Tekin artıq son nəfəsini verirdi.

Tayfun Duygulu sözü və bəstəsi özünə məxsus Kerim Tekinin oxuduğu “Kar Beyaz” mahnısının hekayəsini danışarkən təəccüblü bir faktı da açıqlayıb: “Kerim Tekin bizə həmişə deyirdi ki, mən yol qəzasında öləcəyəm, bəlkə albom yaxşı satılar”.