Kosovoda toqquşmalar davam edir

Kosovonun şimalında serblərlə toqquşmalarda xəsarət alanların sayı 75 nəfərə çatıb. NATO-nun beynəlxalq missiyasının isə 20-dən çox əməkdaşı yaralanıb.

Məlumata görə, missiyanın italyan, macar kontingenti daha çox hücuma məruz qalıb və müxtəlif xəsarətlər alıblar. Missiyanın komandiri Ancelo Mişel Ristuçça bildirib ki, NATO bölmələrinə əsassız hücumlar qəbuledilməzdir və missiya mandatını qərəzsiz yerinə yetirməyə davam edəcək.

Gərginlik fonunda Serbiya Prezidenti Aleksandar Vuçiç xalqa müraciət edib. O, ölkəsinin Kosovo ilə inzibati sərhədə hərbi qüvvələr yerləşdirdiyini bildirib. Dövlət başçısı vurğulayıb ki, NATO-nun rəhbərlik etdiyi Beynəlxalq Təşkilat Qüvvələri təminatların əksinə olaraq, Kosovonun şimalında və Metoxiyadakı serbləri qoruya bilməyiblər.

Bildirilir ki, NATO-nun rəhbərlik etdiyi Beynəlxalq Təhlükəsizlik Qüvvələri Kosovo və Metoxiyadakı Zvecan bələdiyyəsinin inzibati binası qarşısında etiraz aksiyası keçirən serblərə hücum edib. NATO qüvvələri insanlardan binadan uzaqlaşmalarını istəyiblər. Etirazçılar isə silahlı olmadıqlarını və aksiyanın dinc keçdiyini göstərmək üçün əllərini yuxarı qaldıraraq yerə oturmağa qərar veriblər. Qeyd olunur ki, bundan sonra Beynəlxalq Təhlükəsizlik Qüvvələri səsli qumbara və gözyaşardıcı qazdan istifadə edib.